توفي الاستاذ الجامعي عماد الغانمي عن عمر يناهز 43 سنة وهو استاذ متعاقد اصيل بنزرت اب ل3 اطفال وذلك بالمستشفى الجهوي حبيب بورقيبة بصفاقس.
وكان قد تم ايقاف الغانمي عن العمل مؤخرا باعتباره استاذ جامعي متعاقد فاتجه الى ولاية صفاقس لشراء بعض الالعاب والسلع الخفيفة للتجارة بها خلال فترة العيد. وفي طريق الحنشة تم الاعتداء عليه من طرف أعوان الامن وقاموا بافتكاك السلع واوراق دراجته وفي لحظة غضب قام بشراء كمية من البنزين واتجه نحو مركز الحنشة وقام باحراق نفسه حسب ما روت زوجته.
وكان المدون ياسين العياري كتب عن تفاصيل الحادثة يوم الخميس أي قبل وفاته:
اسمحولي نعكر عليهم و نزعجكم و نحكيلكم حكاية عماد، كيما وصلتني من قريبه.
عماد الغانمي من بنزرت، عنده تلاثة صغار.
عماد قرى، وصل استاذ جامعي مساعد متع رياضيات، قرى الطلبة 4 سنين في المهدية و تلاثة سنين في الانسات مع تحضير رسالة الدكتوراه متاعه.
بقرار سياسي خرج وزير التعليم العالي عماد و 2600 من زملائه.. موش هذا موضوعنا
تعب عماد نفسيا، تعب برشة، في ليلة و نهار و هو رب عائلة يلقى روحه بطال في عمر 43
اش يعمل عماد، امالة يشد القهوة ؟ يقعد يتغبن قال شنوة هاني استاذ جامعي؟
لا، شمر عماد على ذريعاته و خدم خدام حزام، خدم المرمة، خدم الخدم الي ما حب عليها حد.
وقت صارت الحكاية، عماد، الاستاذ الجامعي الي كمل رسالة دكتوراه متاعه في الرياضيات و مناقشتها تحدد حتى تاريخها، عماد يخدم لاهي بالشيش في قهوه في بنزرت.
عماد كسب ثقة مولى القهوة و تفاهم معاه يولي عماد يهبط لصفاقس يجيب المعسل و مولى القهوة ياخذ عليه.
لم عماد الي وراه و الي قدامه، شرا موطور و هبط عليه من بنزرت لصفاقس، و زاد تسلف باش يشري السلعة.
في الطريق و هو مروح لأولاده فرحان ليلة العيد، يوقفوه زوز حرس (5 جويلية التلاثة متع الصباح) في الحنشة فكولوا السلعة خاطر ما فرحش بيهم و زادوا فشخوه كسروله خشمه، هانوه و ذله.
دارت بيه الدنيا، حس حياته عدم، حس بالرخص و قهر الرجال و الظلم، كلم صاحبه جاه من بومرداس يروح بيه، الموطور هرسوه
صاحبه قله نمشيو لرئيس المركز اشكيله، يرجعولكش سلعتك، اشكي بلي ضربوك و هانوك
مشاو للمركز، قعد عماد يستنى في رئيس المركز
التسعة غير ربع عماد كلم مرته بالتاليفون، و بعد تاليفونه تسكر
التسعة و نص كلموهم.. عماد حرق روحه م الغلبة و الهم و الظلم .. الله و اعلم اش عملوله في المركز..
عيدو الحرس و رئيس المركز مع ولادهم، و عيد عماد في الصبيطار.
عماد بين موت و حياة، 87 % محروق.
عندكم تصويرة عماد، و تصويرة اش خلى البوليس من عماد.
