تعيش السيدة ماجدة الرومي الحزن مضاعفاً هذه الأيام، بفقدانها لوالدتها وللموسيقار ملحم بركات ابن بلدتها.
الماجدة التي تركت عزاء والدتها ووصلت إلى الجنازة، ملامح الحزن والأسى بدت عليها وكانت قد ودعت الموسيقار برسالة مؤثرة جاء فيها:
من عَزا إمي للعَزا فيك ومن دير القرقفي كفرشيما لكنيسة مار بطرس وبولس كفرشيما
قطعت المسافة بضيعتنا الصغيرة وأنا قلبي عم يعصرو الأسى وأنا عم بسمع صوتك طالع من كل شارع وحي..
وصوتك نفسو نفسو يا ملحم يلي فرّحني العمر كلّو مبارح نفسو نفسو ما ترك بعينييّ دمعة وحدة إبْكِيها.
وهيي نفسها نفسها شوارع كفرشيما يا ملحم يلي تمشّينا عليها بضيعتنا صغار وزهّرتلنا صغار وضحكتلنا صغار وهديتنا كل ربيع وكل أمل هيي نفسها نفسها مبارح شفتها خريف حزين مستعد يرمي كل وراقو ويبكي معنا ويكتب معنا
وتابعت:
“كلّو رايح وج الله بس وحدو اللي باقي..
وشفت الدنيا حزينة عليك مثلنا وبتحبّك مثلنا ورح تشتقلك مثلنا وتقول لكل جيل جايي بعدنا
إنك من أعظم الأصوات يلي مرقت على هالشرق إنك صوت إذا رَق
بيبكّي الحجر وإذا جن بتنحِنيلو العاصفة وإذا تجلّى بتِخْضَر فينا جَنّات وإنك جملة لحنية متفوّقة عريقة رح تبقى درس بالأصالة لكل عاشق موسيقى اليوم وكل يوم ولتنتهي الايام..
أبو مجد يا حبيب اللبنانيي وكل العرب يا إبن كفرشيما البار مهما بعّدتنا الإيام رح نرجع نلتقى هيدا إيماننا بالله
وحتى نلتقى لنغني للأبد أمجاد الرب
بسألك بمحبّة طالعة من نص قلبي تِقبَل منّي بهاليوم الحزين كتير
تقديري العظيم لفنك الأصيل لصوتك العالمي ولكل يلي كنتو بهالحياة ..
