لم تتصور يوما أن عام 2016 سيكون سنة شؤم عليها وعلى عشيقها بارتكابها جريمة قتل، تؤدى بهما فى غياهب السجن، كما حدث مع “ا ا ش” 15 سنة، ربة منزل، وعشيقها “ا ع ش” 29 سنة، عامل، المتهمين بقتل “حماة” المتهمة الأولى بمنطقة السلام . وروت المتهمة فى القضية المقيدة برقم 2562 لسنة 2015م إدارى السلام، التى أجراها المستشار محمد الجرف، مدير نيابة حوادث شرق القاهرة الكلية، تفاصيل الواقعة، حيث قالت “اللى حصل إنى بحب “ا ع ش”، ابن عمى، من زمان، لإننا يعتبر متربيين مع بعض، وهو اتقدم لوالدى اللى هو عمه أكتر من مرة عشان يتجوزنى، لكنه رفض بسبب الخلافات اللى كانت بينه وبين عمى، وساعتها اتحجج لعمى بأن سنى لسه صغير” . وأضافت المتهمة: “مرت الأيام وخلتى جت خطبتنى لابنها، ورغم أنى مكنتش موافقة، إلا إن والدى أجبرنى على الجواز لابن خالتى، ومن حوالى 5 شهور إجوزنا، وكنا عايشين كويس الفترة اللى فاتت، لحد ما بدأ ابن عمى يتردد علينا بحجة صلة الأرحام، وكانت حماتى بتستقبله استقبال كويس، فى الوقت ده كان ابن عمى بدأ يعرف الأوقات اللى جوزى بيتأخر فيها فى الشغل والمواعيد اللى حماتى بتشتغل فيها وبييجى البيت يسأل علينا” . وأشارت المتهمة: “حذرت ابن عمى كذا مرة إنه مينفعش ييجى يزورنى ومحدش موجود فى البيت، ولإنى كنت بحبه وبيحبنى قبل الجواز من ابن خالتى، وقدر يقنعنى باسم الحب إنه ميقدرش يبعد عنى، ومن هنا بدأت قصة خيانتى لجوزى معاه، وفضل يتردد عليا فى الشقة، لغاية ما حصل اللى حصل ” . وأوضحت المتهمة: “يوم رأس السنة كان جوزى فى الشغل، وكمان حماتى كانت فى شغلها وهى بتشتغل عاملة نظافة بمستشفى السلام، وفجأة من غير ما نحس لقينا حماتى بتفتح أوضة النوم وإحنا نايمين مع بعض، راح ابن عمى ماسك الطرحة بتاعتى اللى كانت على الكرسى، وقام كتم نفسها وخنقها بيها، وقالى خلاص ماتت، ولما قربت منها لقيتها لسه فيها الروح وإنها مغمى عليها، قام جايب السكينة وطعنها بيها”. وأكدت المتهمة: “ساعتها فضلنا قاعدين جنب الجثة مش عارفين نعمل أيه وهو كان عاوز يسبنى ويمشى، قولتله هقول على كل حاجة ومش هشيلها لوحدى، وفضلنا نفكر فى طريقة عشان نخرج من الكارثة اللى وقعنا فيها، راح قايلى إحنا نرميها من المنور كأننا ملناش علاقة بالموضوع، وفعلا قمنا رميناها من المنور، والجيران سمعوا صوت حاجة جامده بتقع فى المنور، قاموا شافوها ونقلوها على المستشفى، ولما جت النيابة واكتشفت اللى حصل، خلونا نمثل الجريمة راح الأهالى والجيران اتلموا علينا وكانوا عاوزين يقتلونا لولا رجال الشرطة، ودا كل اللى حصل” . من جانبه، قرر المستشار محمد الجرف، مدير نيابة حوادث شرق القاهرة الكلية، وبإشراف المستشار محمد عبد الشافى، المحامى العام الأول، حبس المتهمة وعشيقها 4 أيام على ذمة التحقيقات، على خلفية قتل المتهمة الأولى وعشيقها لـ”حماتها” بمدينة السلام .
